Ва ўмовах пандэміі каранавіруса ў свеце змяняецца не толькі звыклы лад жыцця людзей, але і арганізацыя работы ўстаноў, прадпрыемстваў, цэлых галін. Падаўжаюцца школьныя канікулы, ажыццяўляецца перавод на выдалены рэжым працы і дыстанцыйнае навучанне, людзі сыходзяць у вымушаныя адпачынкі або зусім, як у Расіі, аб’яўляецца нерабочы перыяд і рэжым самаізаляцыі. Зразумела, усе гэтыя меры абумоўлены толькі адным – захаваннем жыцця і здароўя людзей.
Аднак нават у самай складанай сітуацыі не могуць перайсці на рэжым самаізаляцыі ўрачы, праваахоўнікі, ратавальнікі, работнікі прадуктовых крам і аптэк, грамадскага транспарту і прадпрыемстваў харчовай прамысловасці, спецыялісты камунальных службаў, сельскагаспадарчых арганізацый, органаў дзяржаўнага кіравання.
Калі завершыцца "смутны час", мы нахілімся да зямлі перад усімі медыцынскімі работнікамі і не забудзем сказаць словы падзякі іншым прафесіяналам, якія забяспечвалі дзейнасць дзяржавы і жыццё грамадзян нават у такіх няпростых умовах.
Узброеныя Сілы Рэспублікі Беларусь таксама функцыянуюць у звычайным рэжыме, выконваюць задачы паводле прызначэння. Вайсковыя часці і падраздзяленні нясуць баявое дзяжурства, займаюцца планавай баявой падрыхтоўкай. Асабовы склад удзельнічае ў вучэннях і трэніроўках, ахоўвае вайсковыя аб’екты, абслугоўвае тэхніку, ажыццяўляе яе перавод на летні рэжым эксплуатацыі.
Ва ўмовах пандэміі вайскоўцы знаходзяцца ва ўмовах значна большай бяспекі, чым іншыя грамадзяне. Нават пры тым, што салдаты і афіцэры з прычыны спецыфікі сваёй службы і паўсядзённай дзейнасці часта не могуць прытрымлівацца рэкамендаванага насельніцтву рэжыму сацыяльнага дыстанцыянавання.
Найперш у салдат абмежаваны кантакты з мясцовым насельніцтвам, бо яны практычна пастаянна знаходзяцца ў вайсковых гарадках або на палігонах. У казармах, сталовых і іншых месцах агульнага карыстання пастаянна ажыццяўляецца строгі санітарны кантроль. Своечасова праводзіцца лабараторная дыягностыка. У складанай эпідэміялагічнай сітуацыі ў месцах дыслакацыі вайскоўцаў аўтаматычна ўводзіцца каранцінны рэжым. Больш за тое, салдаты заўсёды знаходзяцца ў полі зроку сваіх камандзіраў і таварышаў па службе, а значыць, не заўважыць ці ўтаіць відавочныя сімптомы захворвання проста немагчыма.
Акрамя таго, у кожным злучэнні і вайсковай часці маюцца свае медыцынскія падраздзяленні. Усе яны забяспечаны медыцынскім абсталяваннем, не меней сучасным за дзяржаўныя бальніцы. У выпадку неабходнасці вайскоўцы могуць быць эвакуіраваны ў спецыялізаваныя лячэбныя ўстановы не толькі аўтамабільным, але і вайсковым авіяцыйным транспартам.
Але ў няпросты для грамадства час армія не можа заставацца ўбаку. Прэзідэнт Беларусі распарадзіўся прыцягнуць вайсковых медыкаў для аказання садзейнічання медыцынскаму персаналу бальніц у барацьбе з віруснымі захворваннямі. Кіраўнік дзяржавы расцэньвае ўдзел вайсковых спецыялістаў не толькі як іх дадатковае навучанне, істотную дапамогу, але і як спосаб аб’ектыўнага кантролю сітуацыі.
Трэба адзначыць, што сёння ў многіх дзяржавах армія задзейнічаецца ў мерапрыемствах па барацьбе з распаўсюджваннем каранавіруса. Разгорнутыя палявыя медыцынскія шпіталі, вайсковыя аўтамабілі ажыццяўляюць розныя перавозкі, вайскоўцы ўдзельнічаюць у ахове важных аб’ектаў, дэзінфекцыі памяшканняў, тэхнікі і тэрыторыі. У некаторых краінах, дзе аб’ём работ вялікі, а сіл і сродкаў не хапае, на дапамогу прыходзяць ваеннаабавязаныя.
Так, прэзідэнт ЗША Дональд Трамп распарадзіўся накіраваць у горад Нью-Йорк тысячу вайскоўцаў для аказання дапамогі гарадскім уладам, яшчэ тысячы вайсковых медыкаў рыхтуюцца да адпраўкі ў іншыя штаты краіны. У Швейцарыі абвешчаны прызыў у войска да канца чэрвеня каля 8 тыс. рэзервістаў з ліку медыкаў, спецыялістаў па пытаннях лагістыкі і бяспекі. Бундэсвер пачаў заклікаць вайсковых рэзервістаў-медыкаў, якія ўзмацняюць персанал вайсковых шпіталяў, а таксама накіроўваюцца ў шпіталі 35 гарадоў і раёнаў на дапамогу грамадзянскім урачам. Для аказання сістэме аховы здароўя падтрымкі як ва ўласна медыцынскай сферы, так і ў галіне лагістыкі прызываюцца ў войска з запасу рэзервісты Аўстрыі, Вялікабрытаніі, Ізраіля, шэрагу іншых краін. 2 красавіка ўказ па закліку ваеннаабавязаных на спецыяльныя зборы для ўкамплектавання тэрытарыяльных войскаў падпісаны прэзідэнтам Казахстана. Рэзервісты ў межах сваіх населеных пунктаў будуць несці службу на блокпастах, патруляваць, праводзіць дэзінфекцыю і ажыццяўляць ахову аб'ектаў.
Медыцынская служба беларускага войска – сапраўдны рэзерв сістэмы аховы здароўя краіны. Узброеныя Сілы маюць у сваім распараджэнні ўласны санітарна-эпідэміялагічны цэнтр, пяць медыцынскіх цэнтраў, тры з якіх з’яўляюцца вайсковымі клінічнымі. Галоўная ж каштоўнасць беларускай вайсковай медыцыны – гэта высокакваліфікаваны персанал. Сярод супрацоўнікаў медыцынскай службы нямала ўрачоў, якія маюць вучоныя ступені. Ёсць спецыялісты, якія атрымалі досвед працы ў баявых умовах у Афганістане, пры ліквідацыі наступстваў катастрофы на Чарнобыльскай АЭС. Беларускія вайсковыя ўрачы рэгулярна ажыццяўляюць практычную дзейнасць у складзе Часовых сіл ААН у Ліване. Цяпер ім трэба здаць новы адказны экзамен.