Усебеларускі народны сход аб’ядноўвае як мінімум тры накірункі: адкрытасць, давер і стратэгічны выбар, лічыць начальнік упраўлення ўнутранай палітыкі Беларускага інстытута стратэгічных даследаванняў Кацярына Пятрашкевіч. Падрабязнасці — у матэрыяле аглядальніка агенцтва «Мінск-Навіны».
Фазы адказнасці
Падчас размовы К. Пятрашкевіч некалькі разоў падкрэсліла адну канцэптуальную думку:
— Быць дэлегатам Усебеларускага народнага сходу — гэта не прывілея, а хутчэй павышаная персанальная адказнасць перад беларускім грамадствам і канкрэтна перад тымі людзьмі, якія даручылі дзейнічаць ад іх імя, прадстаўляць іх інтарэсы ў найвышэйшым прадстаўнічым органе народнага самакіравання Рэспублікі Беларусь.
Моладзь і аналітыка — стратэгія будучыні
Кацярына Алегаўна адзначае, што падрыхтоўка Праграмы сацыяльна-эканамічнага развіцця краіны да 2030 года, якая ў выніку будзе разглядацца на УНС, праводзілася (у тым ліку) з улікам аналітыкі, сацыялагічных даследаванняў і праектаў, што рэалізуюцца на пляцоўцы Беларускага інстытута стратэгічных даследаванняў.
— Вывучэнне грамадскіх настрояў і прапаноў грамадзян з’яўляецца пацвярджэннем таго, што народная думка абавязкова ўлічваецца пры распрацоўцы і прыняцці стратэгічна важных рашэнняў. І гэта не проста лозунгавыя словы. Далёка за канкрэтнымі прыкладамі я не пайду. Пацвярджэннем маіх слоў з’яўляецца маладзёжны аналітычны рух «Будучыня Беларусі», які развіваецца на пляцоўцы нашага інстытута. Сёння з дапамогай гэтага даволі нестандартнага падыходу мы здольны пачуць жывыя, шчырыя, адкрытыя меркаванні маладых людзей.
На думку суразмоўніцы, гэты праект дазваляе спачатку сабраць і абмеркаваць нестандартныя, крэатыўныя ідэі, а таксама зразумець, якой бачыць будучыню сваёй краіны наша моладзь:
— Менавіта такі падыход здольны вывесці рашэнні УНС на прынцыпова новы ўзровень. Асобная ўвага накіравана на практычную рэалізуемасць праграмы сацыяльна-эканамічнага развіцця, удакладненне яе індыкатараў і павышэнне адказнасці выканаўцаў.
Чаму менавіта так?
Гаворачы пра асноўныя чаканні ад УНС, К. Пятрашкевіч звярнула ўвагу на максімальна адкрыты, змястоўны дыялог, які вызначае ўзровень камунікацыі на народным вечы.
— УНС — гэта ўнікальная пляцоўка, дзе прадстаўнікі розных сфер і ўзроўняў дзяржаўнага кіравання абмяркоўваюць і вызначаюць стратэгічныя шляхі развіцця краіны. Упэўнена, што менавіта дзякуючы максімальнай адкрытасці пры абмеркаванні і падрыхтоўцы рашэнняў нараджаюцца праграмныя дакументы і канцэпцыі, заснаваныя на балансе інтарэсаў і рэальным разуменні патрэбаў грамадства.
Чаканні і прагнозы
— Чакаю, што на маючым адбыцца пасяджэнні разам з маштабнымі пытаннямі сацыяльна-эканамічнага развіцця дзяржавы і нацыянальнай бяспекі ва ўсіх яе аспектах асаблівая ўвага таксама будзе нададзена пытанням інавацый і інвестыцый, развіццю рэгіёнаў, якасці жыцця грамадзян, моладзі і яе ролі ў развіцці сучаснага грамадства, — лічыць эксперт. — Не сумняваюся, удзельнікі УНС закрануць такія важныя тэмы, як захаванне гістарычнай памяці і традыцыйных сямейных каштоўнасцяў.
На думку прадстаўніка грамадзянскай супольнасці (К. Пятрашкевіч увайшла ў склад УНС ад Мінскай гарадской структуры Рэспубліканскага грамадскага аб’яднання «Белая Русь»), адну з задач працы дэлегатаў можна сфармуляваць наступным чынам: зрабіць так, каб грамадзяне Беларусі рабілі ўсё магчымае для таго, каб адчуваць сваю датычнасць да агульнай справы, разумелі сваю ролю ў рэалізацыі дзяржаўнай палітыкі і бачылі, як іх меркаванні і ідэі ўплываюць на развіццё краіны.
Прыватнае пытанне
К. Пятрашкевіч замужам. Разам з мужам яны выхавалі і вырастылі двух дзяцей, якімі па праву ганарацца. Старэйшы сын — афіцэр Узброеных Сіл Рэспублікі Беларусь, дачка — будучы дзеяч культуры, у дадзены момант атрымлівае спецыяльнасць харэографа.
— Калі казаць пра сферу маіх прафесійных інтарэсаў, — разважае прадстаўнік БІСД, — то да яе можна ў першую чаргу аднесці ўдзел у арганізацыі маладзёжнай палітыкі, аналіз сацыяльных і палітычных працэсаў, вывучэнне іх уплыву на грамадства, а таксама ўдзел у арганізацыі і правядзенні сацыялагічных даследаванняў.
Крыніца: Агенцтва «Мінск-Навіны»