Тэндэнцыя папулярызацыі электронных плацяжоў, безумоўна, не пакіне без увагі і беларускі фінансавы рынак. Пастанова Нацбанка №328 ад 21 кастрычніка 2020 года пашырае паэтапна магчымасці фінтэху на нашым рынку, рэгламентуючы правілы функцыянавання пазабанкаўскіх сістэм і платформ. Будуць паступова здымацца абмежаванні па мэтах расходавання электронных сродкаў. Акрамя таго, банкі і нябанкаўскія крэдытна-фінансавыя арганізацыі атрымаюць магчымасць аказваць паслугі па абмене электронных грошай між рознымі сістэмамі разлікаў.
У межах ключавога трэнда па дэвалютызацыі эканомікі для рэзідэнтаў Беларусі рэгламентуецца ажыццяўленне аперацый з электроннымі грошамі (эмісія, распаўсюджванне і пагашэнне) толькі ў нацыянальнай валюце. Пры гэтым аб’ём аперацый, каторыя будуць праводзіцца фізічнымі асобамі, таксама плануецца пашырыць.
Цяпер спектр тавараў і паслуг, каторыя можна будзе аплаціць з электроннага кашалька, значна павялічыцца. Мяркуецца, што найбольш шырокае прымяненне віртуальным грошам знойдзецца ў галіне ігральнага бізнесу, розыгрышу латарэй і інтэрактыўных гульняў. Для фізічных асоб выкананне патрабаванняў валютнага заканадаўства застаецца абавязковым: разлікі з дапамогай электронных кашалькоў, адкрытых у замежнай валюце, між фізічнымі асобамі будуць па-ранейшаму па-за законам.
Неабходна адзначыць, што дадзеныя меры ў комплексе дазволяць забяспечыць высокую канкурэнтаздольнасць нацыянальнага плацёжнага рынку, сфарміраваць больш спрыяльны інвестыцыйны клімат і ствараць асновы для экспарту плацёжных паслуг. Нягледзячы на тое, што пры ажыццяўленні аперацый між рэзідэнтамі павінны выкарыстоўвацца электронныя грошы, эміціраваныя банкамі, можна прагназаваць, што па меры пашырэння даступнасці паслуг і аптымізацыі звязаных з імі выдаткаў плацёжны рынак Беларусі будзе прыцягваць усё больш нябанкаўскіх пастаўшчыкоў плацёжных паслуг, фарміруючы спрыяльнае бізнес-асяроддзе. На гэтым фоне адбудзецца змяншэнне расходаў насельніцтва пры выкананні сваіх грашовых абавязкаў, а таксама зніжэнне тарыфаў на разліковае і касавае абслугоўванне ў час выкарыстання інавацыйных форм рэалізацыі плацяжоў. У якасці асноўнага следства такой трансфармацыі можна прагназаваць трэнд замены нябанкаўскімі пастаўшчыкамі плацёжных паслуг нерэнтабельных банкаўскіх аддзяленняў і дарагой банкаўскай інфраструктуры. Гэтыя магчымасці абавязкова будуць выкарыстоўвацца і ў невялікіх населеных пунктах, ствараючы ўмовы для з’яўлення новых працоўных месцаў і цыфравізацыі ў рэгіёнах.