Важнасць моладзевага аналітычнага руху ў Беларусі складана пераацаніць. Яго развіццю паспрыяе сумесны праект Беларускага інстытута стратэгічных даследаванняў, Міністэрства адукацыі і Нацыянальнага дзіцячага тэхнапарка, які сёння аб'яднаў маладых аналітыкаў з усёй краіны.
Сярод навучэнцаў – аспіранты і маладыя навукоўцы ўстаноў вышэйшай адукацыі. Усяго 25 чалавек. Якія веды атрымаюць рабяты, на цырымоніі адкрыцця Летняй школы маладога аналітыка раcказаў дырэктар Беларускага інстытута стратэгічных даследаванняў Алег Макараў:
- Гэта агульнарэспубліканскі эксперымент, вынік цэлага года працы і ўзаемадзеяння з моладдзю ўсіх ВНУ краіны. Пераможцы праекта атрымалі ўнікальную магчымасць стаць удзельнікамі летняй школы аналітыкі. Рабяты даведаюцца, што наогул такое аналітыка. Яны сустрэнуцца з цікавымі людзьмі, пабываюць у Парку высокіх тэхналогій, наведаюць Цэнтральную выбарчую камісію і даведаюцца, як працуе БІСД.
Пры адборы ўдзельнікаў не рабілі ўпор на канкрэтныя спецыяльнасці, бо аналітыка – гэта пра ўсе сферы жыцця грамадства і дзяржавы, удакладніў Алег Макараў:
- Для нас было важна, як рабяты працуюць у камандзе, як апрацоўваюць інфармацыю і наколькі яны матываваныя. Мы прапанавалі ім зрабіць праекты пра будучыню Беларусі ў зусім розных сферах. Медыцына, адукацыя, IT, штучны інтэлект... Каму што падабаецца. Аналітыка – гэта міждысцыплінарная сфера дзейнасці, не прывязаная ні да эканомікі, ні да іншых галін, таму любы ўдзельнік мог сябе праявіць па сваім профілі.
Летняя школа маладога аналітыка працягнецца да 24 жніўня. Рабятам трэба будзе сустрэцца з экспертамі, наведаць Парк высокіх тэхналогій і Цэнтральную выбарчую камісію, пазнаёміцца з дзейнасцю БІСД. Гэта дасць ім больш дакладнае разуменне, як працуе аналітыка і падкажа вектар для будучых праектаў, якія будуць запатрабаваныя ў нашай краіне.
