20 жнiўня, Мiнск /Карр. БЕЛТА/. Дырэктар Беларускага інстытута стратэгічных даследаванняў Алег Макараў расказаў, якія тэмы абмяркуюць падчас летняй школы маладога аналітыка, якая стартавала 20 жніўня, перадае карэспандэнт БЕЛТА.
"Гэты агульнарэспубліканскі эксперымент – вынік цэлага года працы і ўзаемадзеяння з моладдзю ўсіх ВНУ краін. У ім удзельнічала 35 каманд. Пераможцы праекта атрымалі ўнікальную магчымасць стаць удзельнікамі летняй школы аналітыкі. Мы спадзяемся, што яны атрымаюць веды аналітыкі, падрыхтоўкі дакументаў, сустрэнуцца з цікавымі людзьмі, пабываюць у Парку высокіх тэхналогій, у Цэнтральнай выбарчай камісіі, сустрэнуцца са знакавымі людзьмі і пачуюць, як працуюць Беларускі інстытут стратэгічных даследаванняў", - сказаў Алег Макараў.
"Мы прапанавалі маладым людзям зрабіць праекты пра будучыню Беларусі ў зусім розных сферах: медыцына, адукацыя, IT, штучны інтэлект. Аналітыка – гэта міждысцыплінарная сфера дзейнасці, не прывязаная ні да эканомікі, ні да іншых галін, таму любы ўдзельнік мог сябе праявіць па сваім профілі. Для нас было важна, як яны працуюць у камандзе, апрацоўваюць інфармацыю, наколькі яны матываваныя і чаго яны хочуць", - дадаў дырэктар БІСД. Паводле яго слоў, у праекце ўдзельнічала 130 чалавек, а ў фінал прайшло 25.
Міністр адукацыі Андрэй Іванец падкрэсліў, што аналітычныя праекты, распрацаваныя моладдзю, не могуць пакінуць абыякавымі. "Па тых праектах, якія наўпрост тычыліся адукацыі, мы пастараліся сустрэцца і іх абмеркаваць. Каб рабіць аналітыку, мы павінны мець сапраўднае разуменне таго, што адбываецца ў нашай краіне. Упэўнены, для развіцця праектаў вам будзе карысна пагутарыць з прадстаўнікамі профільных міністэрстваў па тэме вашых праектаў, таму што ўзнятыя вамі пытанні хвалююць не толькі вас, але і дзяржаву. Гэтыя пытанні датычацца ўкаранення штучнага інтэлекту, нейронавых сетак, лічбавізацыі", - заўважыў Андрэй Іванец. Ён дадаў, што важна абмяркоўваць пытанні эканамічнага характару, а таксама нацыянальнага беларускага поля, у тым ліку дэмаграфічнай бяспекі.
Удзельніца праекта, студэнтка 3-га курса ВДТУ факультэта эканомікі і бізнес-кіравання Ксенія Канстанцінава расказала, што прыехала сюды атрымаць новы вопыт ад калег і дапоўніць праект, прысвечаны магчымасці ўвядзення лічбавага рэйтынгу ў Беларусі. "Каб даведацца, наколькі магчыма ўкараніць яго ў Беларусі і як ён уплывае на бяспеку, мы разгледзелі кітайскі вопыт укаранення такога рэйтынгу, а таксама розныя рэйтынгі бяспекі і шчасця. Я лічу, што важна праводзіць падобныя праекты, таму што ты па-іншаму глядзіш на сітуацыю і атрымліваеш новыя веды", - падзялілася Ксенія Канстанцінава.
Удзельнік праекта Уладзіслаў Казлоўскі адзначыў, што гэты праект стаў выдатнай магчымасцю прымяніць свае навыкі на карысць краіне. "Мы будзем абмяркоўваць і рэгіянальнае развіццё Беларусі, і развіццё сістэмы адукацыі, што вельмі актуальна для моладзі і студэнцтва, і развіццё малых гарадоў, паколькі ў нас сёння шмат прадстаўнікоў з сельскай мясцовасці розных рэгіёнаў краіны. Моладзі вельмі важна знаходзіць шляхі аб'яднання для рэалізацыі сваіх здольнасцяў і рэалізоўваць свае імкненні ў імя канструктыўнай будучыні краіны", - падсумаваў Уладзіслаў Казлоўскі.
