17 ліпеня 2025 года дэлегацыя БІСД на чале з намеснікам дырэктара Віталем Пунчанка наведала кітайскую акадэмію грамадскіх навук у Пекіне – вядучую навукова-даследчую арганізацыю ў галіне гуманітарных і грамадскіх навук у КНР. Тэмай экспертнага семінара сталі двухбаковыя беларуска-кітайскія адносіны і сумесны ўклад дзвюх краін у сусветную антыфашысцкую вайну.
Дырэктар Інстытута вывучэння Расіі, Усходняй Еўропы і Цэнтральнай Азіі прафесар Сунь Чжуанчжы расказаў аб актуальных даследаваннях Кітайскай акадэміі грамадскіх навук па тэматыцы краін Усходняй Еўропы. Прафесар адзначыў, што развіццё ўзаемадзеяння з Беларуссю праходзіць у асаблівы час святкавання 80-й гадавіны перамогі над фашызмам.
Віталь Пунчанка пазнаёміў удзельнікаў семінара з асноўнымі напрамкамі дзейнасці БІСД, бягучымі сацыялагічнымі даследаваннямі, а таксама праектамі ў галіне рэгіянальнага маніторынгу, каштоўнаснай матрыцы беларускага грамадства, моладзевага аналітычнага руху і гістарычнай памяці.
Загадчыца аддзела Украіны, Беларусі, Малдовы і краін Балтыі прафесар Чжао Хуэйжун падкрэсліла выніковасць двухбаковай экспертнай дыпламатыі з беларускай экспертнай супольнасцю. На яе думку, шматгадовае ўзаемадзеянне экспертаў дзвюх краін уносіць істотны ўклад у развіццё беларуска-кітайскіх адносін.
Кацярына Рэчыц выступіла з дакладам аб экспертна-аналітычным суправаджэнні пяцігадовых праграм сацыяльна-эканамічнага развіцця Беларусі. Аналітык вылучыла тэзіс пра важнасць ўбудавання даследаванняў у сістэму прыняцця рашэнняў і ўцягванне грамадства ў іх рэалізацыю.
На семінары абмеркаваны актуальныя міжнародныя і рэгіянальныя пытанні, перспектывы сумесных навуковых даследаванняў і экспертнага ўзаемадзеяння. Бакі дамовіліся прадоўжыць дыялог па тэмах, якія ўяўляюць узаемную цікавасць.
