Дата публикации

АПК, нафтахімія і машынабудаванне застануцца драйверамі беларускай эканомікі пасля пандэміі

Такое меркаванне карэспандэнту БЕЛТА выказаў аналітык Беларускага інстытута стратэгічных даследаванняў (БІСД) Аляксей Аўдонін.

Эксперт адзначыў, што цяпер, калі бачны гарызонт завяршэння пандэміі, многія краіны, у тым ліку Беларусь, падымаюць пытанне аб ключавых сектарах нацыянальнай эканомікі, якія забяспечаць ёй пад’ём, паскарэнне і рост. “Вызначыць панацэю ад спаду цяпер наўрад ці магчыма. Аднак было б утопіяй лічыць, што можна рэзка перабудавацца на працягу некалькіх месяцаў. Адназначна, тыя сектары, якія з’яўляліся драйверамі, будуць рухаць нацыянальныя эканомікі і далей. У выпадку Беларусі гэта машынабудаванне, сельская гаспадарка, перапрацоўчая прамысловасць, нафтахімія”, – мяркуе аналітык БІСД.

Павышэнне эфектыўнасці гэтых галін, развіццё вытворчасці медыцынскіх тавараў і сферы паслуг, IT – гэта тыя кірункі, на якія варта звярнуць асаблівую ўвагу, дадаў ён. Не менш важна, на думку Аляксея Аўдоніна, забяспечваць сістэму аддаленай працы і каардынацыі бізнесу. У Беларусі ў плане развіцця неабходных тэхналогій, надзейнай сістэмы камунікацыі зроблена нямала. Уласна, гэта дазволіла бізнесу дастаткова эфектыўна працаваць у цяперашніх умовах, падкрэсліў аналітык.

Аляксей Аўдонін прагназуе, што ў бліжэйшыя два-тры гады канкурэнцыя ключавых эканамічных цэнтраў абвострыцца. Беларусі важна засяродзіцца на стварэнні сучасных тавараў і паслуг, захаванні сваіх пазіцый на традыцыйных рынках і адкрыцці новых. “У такіх умовах менавіта якасць менеджменту будзе залогам эканамічнага росту”, – адзначыў эксперт.